საქართველოს განათლების, მეცნიერებისა და ახალგაზრდობის მინისტრი გივი მიქანაძე, სამეგრელო-ზემო სვანეთის სახელმწიფო რწმუნებულ დავით ვერავასთან ერთად, წალენჯიხისა ასევე ფოთის მუნიციპალიტეტების პროფესიულ კოლეჯებს ეწვია, სადაც სასწავლო პროცესს გაეცნო.

მინისტრმა საგანმანათლებლო ინფრასტრუქტურა დაათვალიერა და პროფესიული კოლეჯების თანამშრომლებთან შეხვედრები გამართა.

გივი მიქანაძემ შეხვედრებზე პროფესიული განათლების გაძლიერების მიზნით განსახორციელებელი ინიციატივები განიხილა და კოლეჯების თანამშრომლებისგან არსებული გამოწვევების შესახებ მიიღო ინფორმაცია.

მინისტრთან და სახელმწიფო რწმუნებულთან ერთად პროფესიულ კოლეჯებში ასევე იმყოფებოდნენ ფოთის, ხობისა და სენაკის დელეგატი გიორგი ხახუბია, წალენჯიხის მერი გუბა საჯაია და ადგილობრივი ხელისუფლების სხვა წარმომადგენლები.

წალენჯიხის მუნიციპალიტეტის პროფესიული კოლეჯი ,,ლაკადა” პროფესიულ და მომზადება/ გადამზადების 15-მდე პროგრამას ახორციელებს. სასწავლებელში ამჟამად პროფესიულ განათლებას 200-ზე მეტი სტუდენტი ეუფლება.

ქალაქ ფოთის პროფესიული კოლეჯი ,,ფაზისი” პროფესიულ და მომზადება/გადამზადების 30-მდე პროგრამას ახორციელებს. ამჟამად სასწავლებელში 400-მდე სტუდენტი სწავლობს. კოლეჯს აქვს ფილიალი, რომელიც მდებარეობს ხობის მუნიციპალიტეტის სოფელ ნოჯიხევში.