ფოთში სანიაღვრე ინფრასტრუქტურის განახლება გრძელდება.

სარეაბილიტაციო სამუშაოები ჩაუტარდა მშვიდობის, ვეკუასა და ნიკოლაძის ქუჩებზე მდებარე სატუმბ სადგურებს. პარალელურად, გაიწმინდა მაგისტრალური სანიაღვრე არხები, რაც მნიშვნელოვნად ზრდის სისტემის გამტარუნარიანობას.

მშვიდობის ქუჩაზე შეიცვალა წყლის ტუმბოები, ხოლო ვეკუას ქუჩაზე განახლდა ჩამკეტი ფარები და დამონტაჟდა ტრანსპორტიორები.

დასრულებული სამუშაოები ქალაქ ფოთის მერმა ბექა ვაჭარაძემ და საკრებულოს თავმჯდომარე ალექსანდრე ტყებუჩავამ დაათვალიერეს.

უახლოეს პერიოდში იგეგმება შავი ზღვის ქუჩაზე მდებარე სატუმბი სადგურის სრული რეაბილიტაცია და გენერატორების მონტაჟი, რაც სისტემის უწყვეტ მუშაობას უზრუნველყოფს.

,,განხორციელებული სამუშაოები მნიშვნელოვნად შეამცირებს უხვი ნალექის დროს ქალაქის დატბორვის რისკს და გააძლიერებს სანიაღვრე ქსელის ეფექტიან ფუნქციონირებას" - განაცხადა ფოთის მერმა ბექა ვაჭარაძემ.