ჩხოროწყუს მუნიციპალიტეტის საკრებულოს გადაწყვეტილებით მუნიციპალიტეტში რეგისტრირებული წარჩინებული სტუდენტები სტიპენდიას მიირებენ. ინიციატივა საკრებულოს თავმჯდომარის მოადგილეს თემო სახურიას ეკუთვნის

„ჩხოროწყუს მუნიციპალიტეტის საკრებულომ მიიღო მნიშვნელოვანი გადაწყვეტილება – დამტკიცდა დადგენილება, რომლის საფუძველზეც მუნიციპალიტეტში რეგისტრირებული წარჩინებული სტუდენტებისთვის დაწესდა მერის სტიპენდია.

აღნიშნული საკითხი საკრებულოს სხდომაზე წარდგენილი იყო ჩემი ინიციატივით,მისი მთავარი მიზანია განათლების ხელშეწყობა, ახალგაზრდების მოტივაციის ზრდა.

მიმაჩნია რომ განათლებაში ინვესტიცია არის ყველაზე გრძელვადიანი და სტრატეგიული ინვესტიცია, რომელიც განსაზღვრავს როგორც ინდივიდის, ისე საზოგადოების განვითარებას.

დადგენილების მიხედვით, სტიპენდია გაიცემა ჩხოროწყუს მუნიციპალიტეტში რეგისტრირებულ 30 საუკეთესო წარჩინებულ სტუდენტზე, რომლებიც აკრედიტებულ უმაღლეს საგანმანათლებლო დაწესებულებებში სწავლობენ და აკადემიური მოსწრებით გამოირჩევიან.

პროგრამა დაფინანსდება მუნიციპალიტეტის ბიუჯეტის „ახალგაზრდობის მხარდაჭერის“ პროგრამის ფარგლებში და უზრუნველყოფს თითოეული სტუდენტისათვის თვეში 250 ლარის სტიპენდიას სემესტრის განმავლობაში.

მინდა განსაკუთრებული მადლობა გადავუხადო ჩხოროწყუს მუნიციპალიტეტის მერს — ჯუმბერ იზორია — რომლის მხარდაჭერის გარეშე ამ ინიციატივის პრაქტიკული განხორციელება შეუძლებელი იქნებოდა.

ასევე მადლობას ვუხდი საკრებულოში წარმოდგენილ ქართული ოცნები-ს გუნდს, რომლებმაც პირველივე დღიდან დაუჭირეს მხარი ინიციატივას.

ჩემი მიზანია, რომ ჩხოროწყუში ეტაპობრივად განხორციელდეს არაერთი ახალგაზრდული პროგრამა — განათლების, სპორტის, კულტურისა და პროფესიული განვითარების მიმართულებით.

მჯერა, რომ პოლიტიკა უნდა იზომებოდეს კონკრეტული შედეგებით და არა დეკლარაციებით. სწორედ ამიტომ, თითოეული ნაბიჯი, რომელსაც ვდგამთ, უნდა იყოს პრაქტიკულ შედეგზე ორიენტირებული.

ახალგაზრდობა არის ჩვენი მუნიციპალიტეტის მთავარი რესურსი და მათი წარმატება არის ჩხოროწყუს წარმატება“ - წერს საკრებულოს თავმჯდომარის მოადგილე თემო სახურია.