სენაკის მერია ათეას ორი ნომინაციის გამარჯვებულია
საქართველოს ადგილობრივ თვითმმართველობათა ეროვნული ასოციაციის მიერ ორგანიზებულ საუკეთესო პრაქტიკის პროგრამის მერვე ეროვნულ კონფერენციაზე, სენაკის მუნიციპალიტეტის მერიამ, ჯილდო, ორ სხვადასხვა ნომინაციაში მოიპოვა. ინფორმაციას სენაკის მერია ავრცელებს.
საუკეთესო მუნიციპალურ პროგრამებად დასახელდა:
მერიის ეკონომიკური განვითარების, სტატისტიკისა და ქონების მართვის სამსახურის მიერ განხორციელებული პროექტი - „ინოვაცია, ეკონომიკა და მდგრადობა - საჯარო დიალოგის ახალი სტანდარტი“, რომელიც მიზნად ისახავს კერძო და საჯარო სექტორებს შორის დიალოგისა და პარტნიორობის განვითარებას ადგილობრივ დონეზე.
მერიის ჯანმრთელობისა და სოციალური დაცვის სამსახურის პროექტი - „დაწყებითი კლასების მოსწავლეთა პროფილაქტიკური გამოკვლევები - ადრეული გამოვლენა და პრევენცია“, რომელიც წარმოადგენს ადგილობრივ დონეზე ჯანმრთელობის დაცვის პოლიტიკის მნიშვნელოვან ინსტრუმენტს და ორიენტირებულია ბავშვთა საჭიროებებზე მორგებულ სოციალურ პროგრამებზე, მათი უფლებების დაცვასა და მავნე ზემოქმედების პრევენციაზე.
პროგრამის ფარგლებში, პროფილაქტიკური გამოკვლევები სენაკის მუნიციპალიტეტის ყველა საჯარო და კერძო სკოლის პირველი და მეორე კლასების 750 მოსწავლეს ჩაუტარდა. ჩატარებული კვლევის შედეგებით, სხვადასხვა სახის დარღვევა 206 მოსწავლეს დაუდგინდა. ჯანმრთელობის პრობლემების ადრეულად გამოვლენა სწორედ მერიის ახალი პროგრამით გახდა შესაძლებელი.
საუკეთესო პრაქტიკის პროგრამების ფარგლებში, სპეციალური ჯილდოები და სიგელები სენაკის მუნიციპალიტეტის მერს, ვახტანგ გადელიას გადაეცა.
ასევე დაჯილდოვდნენ ის თანამშრომლები, რომლებმაც უშუალოდ მიიღეს მონაწილეობა საკონკურსო განაცხადების მომზადებაში.
სენაკის მუნიციპალიტეტიდან სპეციალური ჯილდოები გადაეცათ მერიის ჯანმრთელობისა და სოციალური დაცვის სამსახურის უფროსს, ნატალია ხუბუას და ეკონომიკური განვითარების, სტატისტიკისა და ქონების მართვის სამსახურის სპეციალისტს, დალი ქაჩიბაიას.
