სენაკის მერიამ კვების ცენტრის 237 ბენეფიციარს სააღდგომო ნობათები გადასცა
დღეს სენაკის მუნიციპალიტეტის მერი, ვახტანგ გადელია და საკრებულოს თავმჯდომარე, ჯუმბერ ტყებუჩავა, მოადგილეებთან და საკრებულოს წევრებთან ერთად, მზრუნველობამოკლებულთა კვების ცენტრის ბენეფიციარებს შეხვდნენ. მათ დამდეგი აღდგომის დღესასწაული მიულოცეს და სადღესასწაულო ნობათები გადასცეს.
სასაჩუქრე ნობათები კვების ცენტრის 237 ბენეფიციარსა და მათ ოჯახებს გადაეცა. ნობათი 10 სხვადასხვა სახეობის პროდუქტს მოიცავს და საერთო ღირებულება 10 500 ლარს შეადგენს.
სენაკის მერის განცხადებით, მსგავსი სოციალური ინიციატივები განსაკუთრებით მნიშვნელოვანია დღესასწაულების პერიოდში, რადგან ამ დროს ერთმანეთის მხარდაჭერა და თანადგომა განსაკუთრებულ მნიშვნელობას იძენს.
„ჩვენთვის პრიორიტეტულია, მუნიციპალიტეტში მცხოვრებ თითოეულ ადამიანზე, განსაკუთრებით კი - მზრუნველობამოკლებულთა კვების ცენტრის ბენეფიციარებზე ზრუნვა და მათი მხარდაჭერა. მომავალშიც აქტიურად გავაგრძელებთ მსგავს სოციალურ აქტივობებს და მაქსიმალურად ვიზრუნებთ ჩვენი მოქალაქეების კეთილდღეობაზე,“ - განაცხადა ვახტანგ გადელიამ.
