მარტვილის მუნიციპალიტეტმა ბათუმში, საერთაშორისო გამოფენა „Ebit 2026”-ში მიიღო მონაწილეობა.

მუნიციპალიტეტის მიერ სპეციალურად მოწყობილ საგამოფენო სივრცეში დამთვალიერებელს სამი დღის განმავლობაში შესაძლებლობა ჰქონდა, გასცნობოდა მარტვილის მუნიციპალიტეტის შესახებ ინფორმაციას: კანიონების, ჩანჩქერებისა და დაცული ტერიტორიების უნიკალურ მარშრუტებს, დაწვრილებით შეეტყო სასტუმროებისა და იმ სერვისების შესახებ, რასაც მუნიციპალიტეტი მოგზაურებს სთავაზობს. სტუმრებს მარტვილში ჩამოსხმული, გამორჩეული არომატის ღვინით გაუმასპინძლდნენ. სტენდის სტუმრებს ასევე საშუალება ჰქონდათ დაეგემოვნებინათ ადგილობრივი წარმოების ჩაი.

საგამოფენო სივრცეში მისულ სტუმრებს მარტვილის მუნიციპალიტეტის მერი გიორგი ნაჭყებია და მერის მოადგილე ნანა ბირკაია მასპინძლობდნენ. მათ ვიზიტორებს მიაწოდეს ამომწურავი ინფორმაცია მუნიციპალიტეტის შესახებ, ისაუბრეს მარტვილის, როგორც ერთ-ერთი გამორჩეული ტურისტული ლოკაციის უპირატესობებზე და სამომავლო განვითარების პერსპექტივებზე.

ტურიზმისა და სასტუმრო აღჭურვილობის საერთაშორისო გამოფენა „Ebit 2026“ Expo Batumi-ის ორგანიზებით გაიმართა.