წყალმომარაგების კომპანია: ზუგდიდში წყალმომარაგების ეტაპობრივი აღდგენა 19 სექტემბერს, 13:00 საათიდან დაიწყება
ქალაქ ზუგდიდში, წყალმომარაგების ცენტრალურ ქსელზე დაფიქსირებული დაზიანების სალიკვიდაციო სამუშაოები 24-საათიან, უწყვეტ რეჟიმში მიმდინარეობს - ამის შესახებ ინფორმაციას გაერთიანებული წყალმომარაგების კომპანია ავრცელებს.
„ადგილზე სრული შემადგენლობით მობილიზებულია კომპანიის სპეციალური ტექნიკური ბრიგადები და შესაბამისი მძიმე ტექნიკა.
აღდგენითი სამუშაოების პროცესში გამოვლინდა დამატებითი, გაუთვალისწინებელი ტექნიკური სირთულეები, რამაც სამუშაოების დასრულების ვადის გახანგრძლივება განაპირობა.
წყალმომარაგების ეტაპობრივი აღდგენა 19 სექტემბერს, 13:00 საათიდან დაიწყება.
წყალმომარაგების სრულად აღდგენამდე მოსახლეობის სასმელი წყლით უზრუნველყოფა სპეციალური წყალმზიდი ცისტერნების საშუალებით განხორციელდება.
საქართველოს გაერთიანებული წყალმომარაგების კომპანია ბოდიშს უხდის მოსახლეობას შექმნილი დისკომფორტისთვის“ - წერია გავრცელებულ ინფორმაციაში.
