ჯგალის ადმინისტრაციულ ერთეულში ჯგალი-ჰესის მშენებლობაზე შედგენილია პროექტი,რომელზეც იწყება მსჯელობა. ამ საკითხთან დაკავშირებით, პირველი შეხვედრა ჯგალის ადმინისტრაციულ ერთეულში გაიმართა. პროექტი წარმოადგინა ჯგალის მკვიდრმა ანზორ კვარაცხელიამ. შეხვედრაზე ჯგალი-ჰესის მთლიანი პროექტის გაცნობა გაიმართა.

შეხვედრას ესწრებოდნენ წალენჯიხის მუნიციპალიტეტის მერის პირველი მოადგილე ლაშა ზარქუა,სამეგრელო-ზემო სვანეთის სამხარეო ადმინისტრაციის რეგიონული პროექტების კოორდინირების სამსახურის უფროსი ნუგზარ გაბელია, წალენჯიხის მუნიციპალიტეტის მერიის ეკონომიკისა და ინფრასტრუქტურის განვითარების სამსახურის უფროსი გელა სალია და სამეგრელო-ზემო სვანეთის სამხარეო ადმინისტრაციის რეგიონული პროექტების კოორდინირების სამსახურის პირველი კატეგორიის უფროსი სპეციალისტი ირაკლი ცანავა, ჯგალი-მედანის მაჟორიტარი დეპუტატი მამუკა მიქავა.

აღინიშნა, რომ პროექტის ღირებულება 4 მილიონამდე აშშ დოლარია, სიმძლავრე 2700 კილოვატ საათი. პროექტის მიხედვით ჭანისწყლისა და წისქვილარას წყლის გამოყენება მოხდება. შეხვედრა კითხვა-პასუხის რეჟიმში გაიმართა. პროექტის წარმომდგენმა ისაუბრა ჰესის დადებით მხარეზე, მოსახლეობის დასაქმებაზე და ამავდროულად ენერგოდამოუკიდებლობაზე.

აღინიშნა, რომ პროექტის მიმდინარეობისას მაქსიმალურად იქნება გათვალისწინებული გარემოს დაცვის საკითხები. პროექტის დაწყებამდე კი მოსახლეობასთან ფართომასშტაბიანი შეხვედრები და განხილვები გაიმართება. თუ აღნიშნული პროექტი მისაღები გახდება, როგორც მოსახლეობისთვის, ასევე ადგილობრივი და ცენტრალური ხელისუფლებისთვის, ჯგალი-ჰესის პროექტის ამოქმედება დაიწყება. ჰესის მშენებლობისას დასაქმდება 50-მდე მუშახელი,ხოლო მისი დასრულების შემდეგ, მუდმივი სამუშაო ადგილი 10-მდე ადგილობრივ მუშახელს ექნება.