სრულიად საქართველოს კათოლიკოს-პატრიარქის ღვაწლისა და აფხაზეთის საზოგადოების წინაშე განსაკუთრებული დამსახურების აღსანიშნავად, აფხაზეთიდან დევნილი მოქალაქეები,  21 მარტს, 11:00 საათზე თბილისში მდებარე ილორის წმინდა გიორგის სახელობის ეკლესიაში შეიკრიბებიან, სადაც ტაძრის წინამძღვარი მამა ლევანი (ჯანაშია) სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის ილია II-ის სულის მოსახსენებელ პანაშვიდს გადაიხდის.

სრულიად საქართველოს კათოლიკოს-პატრიარქს, უწმინდესსა და უნეტარეს ილია II-ს განსაკუთრებული კავშირი ჰქონდა აფხაზეთთან. 1967-1977 წლებში იგი ცხუმ-აფხაზეთის ეპარქიის მიტროპოლიტი იყო, ხოლო 2010 წლიდან ბიჭვინთისა და ცხუმ-აფხაზეთის ეპარქია უშუალოდ მის დაქვემდებარებაში გადავიდა.  2016 წელს მისი ინიციატივითა და ლოცვა-კურთხევით თბილისში ილორის წმინდა გიორგის სახელობის ეკლესიის მშენებლობას ჩაეყარა საფუძველი.

პატრიარქი ილია მეორე 17 მარტს, 93 წლის ასაკში გარდაიცვალა. პატრიარქს სიონის საკათედრო ტაძარში 22 მარტს დაკრძალავენ.

საქართველოში გლოვაა გამოცხადებული.