ინფრასტრუქტურის სამინისტროს საკონკურსო კომისიის სხდომამ ზუგდიდის მრავალფუნქციური სპორტკომპლექსის, სენაკის აუზის, წალენჯიხის სკვერის და პარკის პროექტირებისთვის წარდგენილი საკონკურსო კონცეფციები განიხილა.

ზუგდიდის ახალი, მრავალფუნქციური სპორტული კომპლექსი 1000 მაყურებელზე იქნება გათვლილი და გააერთიანებს სავარჯიშო დარბაზებს, ღია მინი ფეხბურთის მოედანს, საჭადრაკო სივრცეს, ჩოგბურთის და პადელის კორტებს.

სენაკში დაგეგმილია 200 მაყურებელზე გათვლილი, თანამედროვე დახურული საცურაო აუზის აშენება.

წალენჯიხაში მდებარე ტერენტი გრანელის სახელობის პარკის რეაბილიტაციის პროექტი ითვალისწინებს საბავშვო და დასასვენებელი ზონების, სპორტული, კულტურული და საგანმანათლებლო სივრცეების მოწყობას. წალენჯიხის სკვერში კი დაგეგმილია რეკრეაციული და ყველა ასაკობრივი კატეგორიის დამსვენებლისთვის განკუთვნილი ზონების მოწყობა.

ინფრასტრუქტურის სამინისტროს საკონკურსო კომისიის სხდომას ინფრასტრუქტურის მინისტრი რევაზ სოხაძე, სახელმწიფო რწმუნებული დავით ვერავა, ხობის, ფოთისა და სენაკის დელეგატი გიორგი ხახუბია, მუნიციპალიტეტების მერები, განათლების, სპორტის სამინისტროსა და ფეხბურთის ფედერაციის წარმომადგენლები ესწრებოდნენ.

კომისია, წარმოდგენილი კონცეფციებიდან, საპროექტო კონკურსებში გამარჯვებულებს რამდენიმე დღეში დაასახელებს.