დავით კოდუა: ახალი მრავალფუნქციური სპორტული კომპლექსი 1000 მაყურებელზე იქნება გათვლილი
ინფრასტრუქტურის სამინისტროს საკონკურსო კომისიის სხდომამ ზუგდიდის მრავალფუნქციური სპორტკომპლექსის პროექტირებისთვის წარდგენილი საკონკურსო კონცეფციები განიხილა.
„ეს სპორტკომპლექსი ახალი შესაძლებლობა იქნება ჩვენი ქალაქისთვის. რაც კიდევ უფრო მეტად შეუწყობს ხელს სპორტისა და ჯანსაღი ცხოვრების წესის პოპულარიზაციას.
ზუგდიდის ახალი, მრავალფუნქციური სპორტული კომპლექსი 1000 მაყურებელზე იქნება გათვლილი და გააერთიანებს სავარჯიშო დარბაზებს, ღია მინი ფეხბურთის მოედანს, საჭადრაკო სივრცეს, ჩოგბურთის და პადელის კორტებს. სპორტული ინფრასტრუქტურა 3,5 ჰექტარზე განთავსდება“ - განაცხადა ზუგდიდის მერმა დავით კოდუამ.
ინფრასტრუქტურის სამინისტროს საკონკურსო კომისიის სხდომას ინფრასტრუქტურის მინისტრი რევაზ სოხაძე, სამეგრელო-ზემო სვანეთის სახელმწიფო რწმუნებული დავით ვერავა, ზუგდიდის მუნიციპალიტეტის მერი დავით კოდუა, განათლების, სპორტის სამინისტროსა და ფეხბურთის ფედერაციის წარმომადგენლები ესწრებოდნენ.
კომისია, წარმოდგენილი კონცეფციებიდან, საპროექტო კონკურსებში გამარჯვებულებს რამდენიმე დღეში დაასახელებს.
