მიმდინარე წლის 30 ივლისს, ახალგაზრდობის სააგენტოსთან თანამშრომლობით, ანაკლიის ბანაკში ახალგაზრდებს სენაკის საოლქო საარჩევნო კომისიის თავმჯდომარე ცოტნე შუშანია შეხვდა, რომელმაც საარჩევნო ადმინისტრაციის საქმიანობის, არჩევნების ორგანიზების ძირითადი პრინციპებისა და ქვეყანაში დანერგილი საარჩევნო ელექტრონული ტექნოლოგიების შესახებ ისაუბრა.

ცოტნე შუშანიამ ასევე ისაუბრა ამომრჩევლის უფლებებსა და პასუხისმგებლობებზე, არჩევნებში ახალგაზრდების მონაწილეობის მნიშვნელობასა და ინფორმირებული არჩევანის გაკეთების აუცილებლობაზე.

შეხვედრის ერთ-ერთი მთავარი თემა საარჩევნო პროცესთან დაკავშირებული დეზინფორმაცია იყო. მონაწილეებმა მოისმინეს ინფორმაცია იმ გამოწვევების შესახებ, რომლებიც ყალბი ინფორმაციის გავრცელებას ახლავს, ასევე გაეცნენ საარჩევნო ადმინისტრაციის სტრატეგიას, რომელიც საზოგადოების სანდო და დროულ ინფორმირებას ისახავს მიზნად.

შეხვედრის დასასრულს ახალგაზრდები ასევე გაეცნენ საარჩევნო ადმინისტრაციის ჟურნალს „არჩევნები 360 გრადუსით“, რომელშიც სიღრმისეულადაა განხილული აქტუალური საარჩევნო საკითხები.

შეხვედრა კითხვა-პასუხის რეჟიმში დასრულდა, რომლის ფარგლებშიც ახალგაზრდებმა მათთვის საინტერესო კითხვებზე პასუხები მიიღეს.

მსგავსი საინფორმაციო შეხვედრები 2026 წლის საზაფხულო ბანაკების პროექტის ფარგლებში ქვეყნის სხვადასხვა რეგიონში აქტიურად გაგრძელდება, რაც ხელს შეუწყობს ახალგაზრდების საარჩევნო განათლებისა და ინფორმირებულობის გაძლიერებას.