ზუგდიდის მერიის წინ ამ წუთებში საპროტესტო აქცია მიმდინარეობს. აქცია საინიციატივო ჯგუფის: „სოლიდარობა თენგო ქობალიას“ ორგანიზებით იმართება. ადგილზე შეკრებილები ზუგდიდის მერიის ეკონომიკისა და ინფრასტრუქტურის სამსახურის ხელმძღვანელის, თენგიზ ქობალიას გირაოს სახით გათავისუფლებას მოითხოვენ. აქციაზე რამდენიმე ადამიანია შეკრებილი, ძირითადად ქობალიას მეგობრები და ახლობლები, ასევე რიგითი ზუგდიდელები.

მათი განცხადებით, თენგიზ ქობალია უკანონო წესების გამოყენებით, საკუთარ კაბინეტში დააკავეს და ხელბორკილები საჯაროდ დაადეს, რაც არ შეესაბამება ნორმებს.

“ჩვენ ვითხოვთ, ის რვა ათასამდე ადამიანი, რომლებმაც ხელი მოვაწერეთ თენგიზ ქობალიას გათავისუფლებას, დაუყონებლივ აღსრულდეს აქმ ხალხის ნება და პატიმრობა გირაოთი შეეცვალოს”, -აცხადებენ აქციის მონაწილეები.

საპროტესტო აქცია მშვიდ ფორმებში მიმდინარეობს. გარე პერიმეტრს და წესრიგს საპატრულო პოლიციის თანამშრომლები იცავენ.

ცნობისათვის, სუს-ის ანტიკორუფციულმა სააგენტომ 24 დეკემბერს მერიის ეკონომიკური პოლიტიკისა და სერვისების მართვის სამსახურის უფროსი თენგიზ ქობალია და მოქალაქე ხუტა ბაღათურია დააკავა. თენგიზ ქობალია დანაშაულის შეუტყობინებლობა, ხოლო მოქალაქე ხუტა ბაღათურია ცრუ ჩვენების მიცემა ედებათ ბრალად.

გამოძიება მიმდინარეობს საქართველოს სსკ-ის 376-ე მუხლით და 370-ე მუხლის მე-3 ნაწილით, რაც სასჯელის სახით ითვალისწინებს თავისუფლების აღკვეთას 3-დან 7 წლამდე ვადით. რამდენიმე თვის წინ ზუგდიდის ყოფილი მერი და ვიცე მერი, ლაშა გოგია და გია გულორდავა დააკავეს. სწორედ აღნიშნულ საქმეს უკავშირდება აღნიშნული ფაქტიც. ყოფილ საჯარო მოხელეებს ბრალად დიდი ოდენობით ქრთამის აღება ედებათ. ისინი ბრალს არ აღიარებენ.