აფხაზეთის მთავრობის თავმჯდომარის მოვალეობის შემსრულებელმა ვახტანგ ყოლბაიამ გადადგომის შესახებ განცხადებით აფხაზეთის უზენაესი საბჭოს ოფიციალურად მიმართა.

ამ წუთებში თავმჯდომარის მოვალეობის შემსრულებლის საკითხთან დაკავშირებით აფხაზეთის უმაღლეს საბჭოში კონსულტაციები მიმდინარეობს. განიხილება რამდენიმე კანდიდატურა, მათ შორის: ჯანრი უბირია, ზურაბ ხონელიძე, დავით ფაცაცია, ლელა გულედანი და რუსლან აბაშიძე.

ყველაზე რეალურ კანდიდატად რუსლან აბაშიძე განიხილება. აბაშიძე წარმოშობით გაგრელია.

2013-2014 წლებში რუსლან აბაშიძე საგარეო საქმეთა სამინისტროს საგანგებო დავალებათა ელჩი იყო. მანამდე კი – 2009-2013 წლებში ესტონეთის რესპუბლიკაში საქართველოს საგანგებო და სრულუფლებიანი ელჩი.

უფრო ადრე, 2006-2009 წლებში იგი კონფლიქტების მოგვარების საკითხებში სახელმწიფო მინისტრის აპარატში სახელმწიფო მინისტრის მოადგილის პოსტს იკავებდა. იყო შვეიცარიაში საქართველოს მუდმივი წარმომადგენლობის მრჩეველი, საგარეო საქმეთა სამინისტროში ევროკავშირთან ურთიერთობების დეპარტამენტის დირექტორის მოადგილე და ა.შ.

რუსლან აბაშიძემ 1997 წელს დაამთავრა თბილისის სახელმწიფო უნივერსიტეტის სოხუმის ფილიალის ეკონომიკის ფაკულტეტი. 1997-1998 წლებში სწავლობდა გერმანიის საგარეო საქმეთა სამინისტროს დიპლომატიურ აკადემიაში. ფლობს ინგლისურ, გერმანულ და რუსულ ენებს. ჰყავს მეუღლე, დიზაინერი თაკო ჩხეიძე და სამი შვილი.