საოკუპაციო ხაზთან მცხოვრები ახალგაზრდების ჩართულობის ზრდა დემოკრატიულ პროცესებში

• 2020 წლის 5 ნოემბრიდან 20  დეკემბრის ჩათვლით, ზუგდიდისა და წალენჯიხის მუნიციპალიტეტებში ხორციელდება პროექტი: „საოკუპაციო ხაზთან მცხოვრები ახალგაზრდების ჩართულობის ზრდა დემოკრატიულ  პროცესებში“.

პროექტი იწვევს მე-9, მე-10, მე-11, მე-12 კლასის მოსწავლეებს შემდეგი სოფლების სკოლებიდან: ახალაბასთუმანი, განმუხური, კოკი, ორსანტია, რიყე, რუხი, ტყაია, შამგონა, ლია, ფახულანი, ჭალე, მუჟავა და ხურჩა.   პროექტში 1 სოფლის სკოლიდან 2 მონაწილე შეირჩევა.

პროექტი მიზნად ისახავს არაფორმალური განათლების მეშვეობით, საოკუპაციო ხაზთან მცხოვრები ახალგაზრდების ჩართულობის ზრდას საზოგადოებრივ ცხოვრებასა და დემოკრატიულ პროცესებში.

პროექტი ხელს შეუწყობს ახალგაზრდების გააქტიურებას, სოფლებში ახალგაზრდული გუნდების ფორმირებას, წაახალისებს ახალგაზრდული ინიციატივების გამოვლენასა და განხორციელებას.

პროექტის ფარგლებში, ახალგაზრდებს შესაძლებლობა ექნებათ გაიუმჯობესონ ცოდნა და უნარები და აიმაღლონ ცნობიერება სხვადასხვა თემაზე, მათ შორის: სამოქალაქო აქტივიზმის, ლიდერული უნარ-ჩვევების, ადვოკატირების; ადგილობრივ დონეზე გადაწყვეტილების მიღების პროცესში ჩართულობისა და თანამონაწილეობის გაზრდის მნიშვნელობის, საქართველოს ევროპული და ევროატლანტიკური ინტეგრაციის პროცესის შესახებ.

პროექტის მონაწილეებს შესაძლებლობა ექნებათ ტრენინგებზე მიღებული ცოდნა პრაქტიკაში გამოიყენონ, გამოავლინონ თავიანთი სოფლის საჭიროებები, შეძლონ პრობლემური საკითხების იდენტიფიცირება, დაგეგმონ ადვოკატირების კამპანიები; მობილიზება გაუწიონ ადგილობრივ მოსახლეობას და მოამზადონ პეტიციები; ამასთანავე, პროექტი ახალგაზრდებს წაახალისებს გამართონ დებატები სხვადასხვა თემაზე; ორგანიზება გაუწიონ საგანმანათლებლო, გარემოსდაცვითი თუ სხვა სახის ღონისძიებების განხორციელებას.

პროექტი მიმდინარეობს „ახალგაზრდების ჩართულობა საქართველოს პოლიტიკურ პროცესებში“ (#GEOYOUTH2020) პროექტის ფარგლებში, რომელსაც ახორციელებს საქართველოს პოლიტიკის ინსტიტუტი (GIP), გერმანულ პარტნიორ ორგანიზაცია Polis180-თან თანამშრომლობითა და გერმანიის საგარეო საქმეთა სამინისტროს ფინანსური მხარდაჭერით.