ირაკლი ღარიბაშვილი: კიბერუსაფრთხოების უზრუნველყოფა კრიტიკულად მნიშვნელოვანია როგორც სახელმწიფოს უსაფრთხოებისთვის, ისე ბიზნესისა თუ საზოგადოების ნორმალური ფუნქციონირებისთვის

კიბერუსაფრთხოება 21-ე საუკუნის ერთ-ერთი მთავარი გამოწვევაა და ზოგადად, კიბერგანზომილება თანამედროვე ცივილიზაციისა და ტექნოლოგიური განვითარების ორგანული ნაწილი გახდა – მას სახელმწიფო ინსტიტუტებისა და ქვეყნის ეკონომიკის ფუნქციონირებისთვის კრიტიკული მნიშვნელობა აქვს, – ამის შესახებ პრემიერ-მინისტრმა, ირაკლი ღარიბაშვილმა „საქართველოს კიბერუსაფრთხოების ფორუმი-2023“-ის გახსნაზე სიტყვით გამოსვლისას განაცხადა.

„ჩვენი ქვეყნის, როგორც ეკონომიკური ჰაბის ფუნქციის ერთ-ერთ ნაწილს, ციფრული ჰაბის როლიც წარმოადგენს. ჩვენ ვავითარებთ შესაბამის ინფრასტრუქტურას, ასევე ტექნოლოგიურ კავშირებს ევროპასთან და ეს ფორუმიც ამ თემისადმი მთავრობის ერთ-ერთი გამოხატულებაა. ჩვენი საზოგადოება, ჩვენი ქვეყნის ეკონომიკა, საგანმანათლებლო სისტემა, სახელმწიფო სერვისები, მთავრობის საქმიანობა თუ რიგითი ადამიანების ცხოვრება მჭიდროდ დაკავშირებულია ციფრულ ტექნოლოგიებთან. საქართველო ტექნოლოგიურად განვითარებული სამყაროს ნაწილია. კიბერუსაფრთხოების უზრუნველყოფა კრიტიკულად მნიშვნელოვანია როგორც სახელმწიფოს უსაფრთხოებისთვის, ისე ბიზნესისა თუ საზოგადოების ნორმალური ფუნქციონირებისთვის“, – განაცხადა ღარიბაშვილმა.