„ქართული ოცნების“ ზუგდიდის დელეგატობის კანდიდატი დავით კოდუა ვიდეო მიმართვას ავრცელებს:

მოგესალმებით ჩემო ზუგდიდელებო, საარჩევნო პერიოდი მიილია. ძალიან დატვირთული და საინტერესო საარჩევნო კამპანია გვქონდა, ჩავატარეთ 130-ზე მეტი შეხვედრა.

კომუნიკაციის ამ ფორმამ მოგვცა შესაძლებლობა გავსაუბრებოდით ათასობით ადამიანს. თქვენგან მოგვესმინა საჭიროებებისა და პრობლემების შესახებ ინფორმაცია. ვისაუბრეთ „ქართული ოცნების” გეგმებზე, პრემიერ-მინისტრის მიერ წარდგენილ პროგრამაზე და ჩვენს მუნიციპალიტეტში განხორციელებულ პროექტებზე.

ძალიან მშვიდი, საქმიანი და კონკრეტული გეგმებით გაჯერებული საარჩევნო კამპანია გვქონდა. არცერთ პარტიას, გარდა „ქართული ოცნებისა”, ზუგდიდში დელეგატი არ წარუდგენია, რაც კიდევ ერთხელ ამტკიცებს მათი ზუგდიდისადმი მიდგომებს – ამ ქალაქის უპატივცემლობას. მხოლოდ ჩვენ ვთავაზობთ მოქალაქეებს ჰყავდეთ მათი მუნიციპალიტეტის ხმა პარლამენტში.

რეალური ძალა, ვისაც ამ მუნიციპალიტეტსა და ქვეყანაში საქმის კეთება შეუძლია, არის მხოლოდ „ქართული ოცნება“.

მოქალაქეებისგან მიღებული მუხტი და მხარდაჭერა უდიდესი პასუხისმგებლობაა პირადად ჩემთვის! მადლობა, რომ ჩვენს გვერდით ხართ. 26 ოქტომბერს ერთობით გავიმარჯვებთ – ამ ქვეყნის და ამ ქალაქის უკეთესი მომავლისა და მშვიდობიანი განვითარებისთვის!

ჩვენ თქვენთან მოვდივართ კონკრეტული გეგმებით. მე თქვენ გთავაზობთ მეტ ჩართულობას. ჩემი პარლამენტში შესვლის დღიდან, ჩვენ დავიწყებთ თითოეული სოფლისა და ქალაქის, ყველა უბნის სამოქმედო გეგმის შექმნას, ეს იქნება მოქალაქეების მიერ შერჩეული პრიორიტეტების სია, რის მიხედვითაც მოხდება იმ პროექტების განხორციელება, რა საჭიროებებიც ჩვენს მოქალაქეებს უდგათ.

მინდა მივმართო ჩვენს დევნილებს, თქვენ მხოლოდ აფხაზეთიდან არ ხართ, თქვენ ამავდროულად ზუგდიდელებიც ხართ, ჩვენ ერთად ვიცხოვრეთ 31 წელი და ჩვენ დიდი ხანია ერთმანეთის ნაწილი ვართ! მე ვიქნები თქვენი წარმომადგენელი, თქვენი ინტერესების გამტარი. ჩვენ ბევრი გავაკეთეთ დევნილებისთვის ღირსეული საყოფაცხოვრებო პირობების შესაქმნელად. ეს პროცესი გრძელდება და კომბინატის დასახლებაში ვახდენთ 1700 ოჯახისთვის ბინების მშენებლობას, უახლოეს პერიოდში დაგეგმილი გვაქვს 1000-მდე სოფლად სახლის შეძენა.

ჩვენ ყველაფერს გავაკეთებთ, რომ, პირველ რიგში, დავიბრუნოთ ჩვენი აფხაზი თანამოქალაქეები და ერთად ვიცხოვროთ ერთიან საქართველოში. სწორედ ეს არის თითოეული ჩვენგანის მთავარი მიზანიც და ოცნებაც.

მე და თქვენ, საქართველოს სიყვარული, მისი კეთილდღეობა, მშვიდობიანი განვითარება და ამ ქვეყნის ევროპული მომავალი გვაერთიანებს. ჩვენ ეს განაცხადი შევიტანეთ კონსტიტუციაში, ჩვენ ეს განაცხადი დავიტანეთ „ქართული ოცნების“ ახალ ლოგოზე და ჩვენ ამ გზას, ახალგაზრდებთან ერთად ბოლომდე გამარჯვებით გავივლით!

ჩემი პარლამენტში ყოფნით თითოეული ზუგდიდელი იქნება პარლამენტის წევრი, მე გავახმოვანებ თითოეული თქვენგანის სათქმელს, თქვენს საჭიროებებს და ერთად ვიმუშავებთ გადაჭრის გზებზე.

26 ოქტომბერს გაიმართება, არა უბრალოდ არჩევნები, არამედ რეფერენდუმი, სადაც უნდა ავირჩიოთ ბნელი წარსული ან საქართველოს ნათელი მომავალი.

ჩემო ძვირფასო ზუგდიდელებო, გელით არჩევნებზე, უნდა გამოვიდეთ ქუდზე კაცი, რათა ერთად დავიცვათ მშვიდობა, ღირსება და კეთილდღეობა – ჩვენი უძვირფასესი სამშობლოსთვის – საქართველოსთვის!” – აცხადებს კოდუა.