ზუგდიდის მერია სოციალურ ქსელში მაცაგაროვის ოჯახთან დაკავშირებით გავრცელებულ ვიდეოს ეხმაურება
ზუგდიდის მუნიციპალიტეტის მერია სოციალურ ქსელში მაცაგაროვის ოჯახთან დაკავშირებით გავრცელებულ ვიდეოს ეხმაურება.
როგორც მერიაში აცხადებენ, მაცაგაროვების ოჯახის საჭიროებებს რეგულარულად ეცნობა ზუგდიდის მერიის სოციალური და ჯანდაცვის სამსახური. მერიის ინფორმაციით, სამსახურის უფროსი ნინო სხულუხია მაცაგაროვების ოჯახთან დღესაც იმყოფებოდა და მათ კიდევ ერთხელ შესთავაზა ქირით გადასვლა, რომელსაც მერია აანაზღაურებს.
„ამასთან, აღსანიშნავია, რომ ოჯახი არაერთი სახელმწიფო და მუნიციპალური პროგრამით სარგებლობს. სწორედ მერიის შესაბამისი სამსახურის წარმომადგენლების ჩართულობით მომზადდა საჭირო დოკუმენტაცია შეზღუდული შესაძლებლობის მქონე პირების სერვისების მისაღებად, რის შედეგადაც ოჯახი სარგებლობს როგორც მუნიციპალური, ასევე სახელმწიფო პროგრამებით.
გარდა ამისა, მაცაგაროვების ოჯახს უკვე მიმდინარე წელს შესაძლებლობა ექნება, განცხადება შეიტანოს სოციალური სახლის მშენებლობაზე. მანამდე კი მერია მზადაა, ოჯახს ქირის თანხა გადაუხადოს.
ამასთან, ოჯახი სარგებლობს თავისუფალი გადაადგილების სოციალური სერვისითაც., მათ აქვთ შესაძლებლობა, ზუგდიდის მუნიციპალიტეტის მერიის უფასო სასადილოს პროგრამით ისარგებლონ“, - აცხადებენ ზუგდიდის მერიაში.
