აბაშაში 167 პირველკლასელმა სასკოლო ცხოვრება დაიწყო
აბაშის მუნიციპალიტეტის მერმა, გიგა გაბელაიამ, სასწავლო წლის დაწყება მოსწავლეებს, პედაგოგებს, მშობლებს პირველი საჯარო სკოლიდან მიულოცა და მათ წარმატებული და ნაყოფიერი სასწავლო წელი უსურვა.
„განსაკუთრებით მინდა მივულოცო ჩვენს პირველკლასელებს, რომლებიც დღეს ცხოვრების ახალ, მნიშვნელოვან ეტაპზე გადადიან. მათ წინ ცოდნისა და შესაძლებლობების სამყაროა, სადაც თითოეული ახალი დღე საინტერესო აღმოჩენებითა და ახალი გამოცდილებით იქნება სავსე. მჯერა, რომ სკოლაში გატარებული წლები მათთვის წარმატებისა და ლამაზი მოგონებების დასაწყისი გახდება.
ახალი სასწავლო წლის დაწყებას ვულოცავ ჩვენს პედაგოგებსაც. მათი პროფესიონალიზმი, თავდადება და ყოველდღიური შრომა უმნიშვნელოვანეს როლს ასრულებს მომავალი თაობის აღზრდასა და განათლებაში.
განათლება ჩვენი ქვეყნის განვითარების ერთ - ერთი უმთავრესი პრიორიტეტია. სწორედ ამიტომ, მნიშვნელოვანია, ბავშვებს ჰქონდეთ არა მხოლოდ ხარისხიანი განათლების მიღების შესაძლებლობა, არამედ უსაფრთხო, თანამედროვე და სათანადოდ აღჭურვილი სასწავლო გარემო. ამ მიმართულებით მნიშვნელოვანი ნაბიჯები უკვე გადაიდგა და საგანმანათლებლო ინფრასტრუქტურის გაუმჯობესებაზე მუშაობა მომავალშიც გაგრძელდება.
ჩვენი მთავარი მიზანია, თითოეულ ბავშვს ჰქონდეს შესაძლებლობა, მიიღოს ხარისხიანი განათლება და ღირსეული წვლილი შეიტანოს ჩვენი მუნიციპალიტეტისა და ქვეყნის განვითარებაში, - აღნიშნა გიგა გაბელაიამ.
ახალი სასწავლო წელი აბაშის მუნიციპალიტეტში 167 - მა პირველკლასელმა დაიწყო. მათ პორტაბელური კომპიუტერები - „ბუკები“ გადაეცათ.
თითოეული მოსწავლე უზრუნველყოფილია სასკოლო სახელმძღვანელოებით, ხოლო აბაშის მუნიციპალიტეტის მერიის მხარდაჭერით, მოსწავლეები უფასო სასკოლო ტრანსპორტით სარგებლობენ.
როგორც ცენტრალური, ასევე ადგილობრივი ხელისუფლებისთვის, განათლებაზე ზრუნვა, მოსწავლეებისთვის შესაბამისი პირობების შექმნა და საგანმანათლებლო ინფრასტრუქტურის განვითარება კვლავ ერთ-ერთ მნიშვნელოვან მიმართულებად რჩება.
წარმატებულ და საინტერესო სასწავლო წელს ვუსურვებთ ყველა მოსწავლეს, პედაგოგსა და მშობელს!
