ჩხოროწყუში 144 პირველკლასელმა სასკოლო ცხოვრება დაიწყო
ჩხოროწყუს მუნიციპალიტეტის საჯარო სკოლებში ახალი სასწავლო წლის დაწყებასთან დაკავშირებით სხვადასხვა ღონისძიებები გაიმართა.
აღნიშნულთან დაკავშირებით, ვახტანგ ფირცხელავას სახელობის №2 და აფხაზეთის №10 საჯარო სკოლებს ჩხოროწყუს მუნიციპალიტეტის მერი ჯუმბერ იზორია, საკრებულოს თავმჯდომარე ჯანო პერტაია, მოადგილეებთან, საქართველოში წმინდა საყდრის დესპან ანტე იოზიჩთან და საქართველოში პარაგვაის საპატიო კონსულ ზურაბ ხუნტუასთან ერთად ესტუმრნენ და მოსწავლეებს, მათ მშობლებსა და პედაგოგებს, განსაკუთრებით პირველკლასელებს, ცხოვრების ახალი, მნიშვნელოვანი ეტაპის დაწყება მიულოცეს და წარმატებული და ნაყოფიერი სასწავლო წელი უსურვეს.
ახალი სასწავლო წელი მუნიციპალიტეტის ყველა საჯარო სკოლაში განახლდა. მიმდინარე სამშენებლო და სარეაბილიტაციო სამუშაოების გამო, 6 სკოლა სასწავლო პროცესს მეორე ცვლაში აგრძელებს.
2026-2027 სასწავლო წელს ჩხოროწყუს მუნიციპალიტეტში 144 პირველკლასელი დარეგისტრირდა. პირველკლასელები სასწავლო წლის დაწყებას ახალი სასკოლო ფორმებით შეხვდნენ.
მუნიციპალიტეტის საჯარო სკოლების ყველა მოსწავლეს სახელმწიფოსგან გადაეცა სასკოლო სახელმძღვანელოები, პირველკლასელებმა კი ახალი სასწავლო წიგნების სრული კომპლექტი და პორტატული კომპიუტერები მიიღეს. მოსწავლეების გადაადგილებას უზრუნველყოფს სასკოლო ტრანსპორტი.
საგანმანათლებლო ინფრასტრუქტურის გაუმჯობესების მიმართულებით ჩხოროწყუს მუნიციპალიტეტში მნიშვნელოვანი სამუშაოები მიმდინარეობს. ამ ეტაპზე 5 ახალი საჯარო სკოლა შენდება.
