ზუგდიდის მეოთხე საჯარო სკოლაში მომუშავე მუშები დილიდან გაიფიცნენ. გაფიცული მუშები დამქირავებლებმა ეზოში ჩაკეტეს, რომ ჟურნალისტებს არ ენახათ, თუმცა STV-ს კამერამ სკოლის ეზოში შეღწევა მოახერხა. გაფიცული მუშების თქმით, მათ უკვე ორი თვეა ხელფასი არ მიუღიათ თუმცა ჩინური კომპანია დაპირებებს ყოველ დღე იძლევა.

“ბოლოს შეგვპირდნენ, რომ ხელფასებს 12 სექტემბერს ჩაგვირიცხავდნენ, შემდეგ 14 სექტემბერიო გვითხრეს და დღემდე არ აგვიღია ხელფასები”-აცხადებს ერთ-ერთი მუშა, რომელმაც კამერასთან საუბარი ხელფასის საერთოდ დაკარგვის შიშით არ ისურვა.

მეოთხე საჯარო სკოლაში მიმდინარე სარეაბილიტაციო სამუშაოები ამ დროისთვის შეჩერებულია. მუშები ეზოში იმყოფებიან და დაპირებულ ხელფასებს ისევ ელოდებიან. ფაქტის დასაფიქსირებლად მისულ STV-ს ჯგუფს  ჯერჯერობით დაუდგენელი პირები კამერის დამტვრევით დაემუქრნენ და ფიზიკური შეურაცხყოფა მიაყენეს.

STV-მ გარკვევა ჩინურ კომპანიასთან სცადა, თუმცა ამაოდ.  ჩინური კომპანიის წარმომადგენლებმა კამერის დამტვრევა უკვე მათ ოფისში სცადეს.

მოგვიანებით კი კომპანიის ოფისში ქართველი წარმომადგენელი მოვიდა, რომელმაც ვინაობის გამხელა და კამერების წინ საუბარი არ ისურვა, თუმცა დამუქრებით დაგვემუქრა.

“ამის გადაღებით ავნებთ ყვე4ლას, იმ მუშებსაც და დამკვეთსაც. ჩვენ არ გვაქვს არავის დავალიანება, ეს ტყუილია. დამკვეთს არ ჩაურიცხავს თანხები ანუ სახელმწიფოს და შეყოვნებაც ამან გამოიწვია”-აცხადებას ჩინური კომპანიის ქართველი წარმომადგენელი, რომლის ვინაობაც STV-თვის უცნობია.

ცნობისათვის, ზუგდიდის ნომერ მეოთხე საჯარო სკოლაში სარემონტო სამუშაოებს ჩინური კომპანია AVIC GREATWALL DADI CONSTRUCTION GROUP Co. Ltd.-ი აწარმოებს.