სენაკის მუნიციპალიტეტის მერიის ორგანიზებითა და საგანმანათლებლო რესურსცენტრის ჩართულობით, მეათე წელია მიმდინარეობს პროექტი ,,საბავშვო არქეოლოგია’’, რომელიც უზრუნველყოფს ნოქალაქევის არქეოლოგიურ-არქიტექტურულ მუზეუმ-ნაკრძალში, საგანგებოდ მოწყობილ იმიტირებულ გათხრებში, მოსწავლეების ჩართულობას.

აღნიშნული პროექტი ხელს უწყობს საბაზისო დონეზე ისტორიული მეცნიერების ისეთი მნიშვნელოვანი დარგის გაცნობას, როგორიცაა არქეოლოგია. პროექტის მიმდინარეობას სენაკის მუნიციპალიტეტის მერი ვახტანგ გადელია პირველ მოადგილესთან, გრიგოლ ბაღათურიასთან და მუნიციპალიტეტის საკრებულოს წევრთან, საბა ოდიშარიასთან ერთად გაეცნო.

არქეოლოგიური იარაღებით აღჭურვილმა ნორჩმა არქეოლოგებმა, ამჯერად, სენაკის კერძო სკოლა-ლიცეუმის მოსწავლეებმა, იმიტირებულ გათხრებში მიიღეს მონაწილეობა; მოპოვებული ნივთები აღწერეს და ექსპონატების ფიქსაცია ,,ნორჩი არქეოლოგის საველე დღიურში’’ მოახდინეს.

დღის ბოლოს, მოსწავლეებს ,,ნორჩი არქეოლოგის’’ სერთიფიკატები გადაეცათ. მუნიციპალიტეტის მერიისა და მუზეუმ-ნაკრძალის ერთობლივ პროექტში, რომელიც მიმდინარე წლის 27 ნოემბერს დაიწყო და 17 დეკემბერს დასრულდება, ქვეყანაში არსებული ეპიდემიოლოგიური ვითარებიდან გამომდინარე, კოვიდრეგულაციების მკაცრი დაცვით, სენაკის საჯარო და კერძო სკოლების 130 მოსწავლე ჩაერთვება.