„სენაკი არტ-ფესტი 2023“, აკაკი ხორავას სახელობის პროფესიულ სახელმწიფო დრამატულ თეატრში, გალაკონცერტით საზეიმოდ დაიხურა.

მაყურებლის წინაშე სენაკის X მუსიკალური ფესტივალის წარმატებული მონაწილეები წარდგნენ.

დასკვნით საღამოს ცნობილი მსახიობები – თათული ედიშერაშვილი და თამარ ნიკოლაძე უძღვებოდნენ.

ლაურეატთა და დიპლომანტთა დაჯილდოებას და ფესტივალის საზეიმო დახურვას სენაკის მუნიციპალიტეტის მერი, ვახტანგ გადელია, საკრებულოს თავმჯდომარე, საბა ოდიშარია, მერის მოადგილე, ლევან ელიავა, ადგილობრივი თვითმმართველობის, მუსიკალური სფეროსა და საზოგადოების წარმომადგენლები დაესწრნენ.

მუსიკალური ფესტივალის საპატიო დიპლომები გადაეცათ სენაკის მუნიციპალიტეტის მერს, ვახტანგ გადელიას, საკრებულოს თავმჯდომარეს, საბა ოდიშარიას, მერის მოადგილეს, ლევან ელიავას, მერიის განათლების, კულტურის, სპორტისა და ახალგაზრდობის სამსახურის უფროსს, გივი მისაბიშვილს, ხელოვნების ცენტრის დირექტორს, ვეფხვია ვეფხვაძეს.

ფესტივალის ჟიურიმ, ვალერიან შიუკაშვილის ხელმძღვანელობით, მოუსმინა საქართველოს მასშტაბით, 50-მდე სამუსიკო და სახელოვნებო სკოლის 3 000-ზე მეტ მოსწავლეს. მათგან ლაურეატის წოდება მიენიჭა – 100-ზე მეტ წარმატებულ შემსრულებელს, გუნდსა და შემოქმედებით ჯგუფს; 2000-მდე მონაწილე – საპატიო დიპლომით, ხოლო 700-ზე მეტი – სიგელით დაჯილდოვდა.

„სენაკი არტ-ფესტი 2023“ , რომელიც სრულიად საქართველოს კათოლიკოს-პატრიარქის ილია II-ის პატრონაჟით, სენაკის მუნიციპალიტეტის მერიისა და საკრებულოს მხარდაჭერით წელს მეათედ გაიმართა, ავთანდილ გოგოტიშვილის სახელობის სენაკის ხელოვნების ცენტრის სამუსიკო სკოლის გაერთიანებულმა გუნდმა, ფესტივალის ჰიმნად ქცეული ვაჟა აზარაშვილის „მუსიკით“, დაასრულა.