ბოლო მონაცემები დიდთოვლობზე ზუგდიდიდან - სტიქიის საგანგებო შტაბის სხდომა
ზუგდიდის მუნიციპალიტეტის მერიაში საკოორდინაციო შტაბის სხდომა გაიმართა. შეხვედრას სხვადასხვა უწყების წარმომადგენლები ესწრებოდნენ, მათ შორის: საგანგებო სიტუაციების მართვის სამსახურის, ზუგდიდის რაიონული პოლიციის, საპატრულო პოლიციის, „ენერგო-პრო ჯორჯიას“ და ,,სოკარ ჯორჯია გაზის“, წარმომადგენლები. ინფორმაციას ზუგდიდის მერია ავრცელებს.
სხდომაზე ზუგდიდის მუნიციპალიტეტში დიდთოვლობით გამოწვეული პრობლემების აღმოფხვრის მიმართულებით დღის განმავლობაში შესრულებული სამუშაოები მიმოიხილეს და შემდგომი ღონისძიებები დაგეგმეს. განსაკუთრებული ყურადღება დაეთმო მოსახლეობის საჭიროებებსა და არსებული პრობლემების დროულად გადაჭრის გზებს.
მერის ინფორმაციით, მუნიციპალიტეტში გზების გაწმენდითი სამუშაოები ინტენსიურ რეჟიმში მიმდინარეობს. მობილიზებულია 22 ერთეული სპეციალიზებული ტექნიკა და იყრება ტექნიკური მარილი.
როგორც ზუგდიდის მუნიციპალიტეტის მერმა დავით კოდუამ აღნიშნა, მნიშვნელოვანია, რომ ყველა პრობლემა მყისიერად მოგვარდეს. განსაკუთრებული ყურადღება გამახვილდა ელექტროენერგიის მიწოდების საკითხზე. ამ ეტაპზე ელექტროენერგია სრულად არ მიეწოდება 18 ადმინისტრაციულ ერთეულს, ხოლო ნაწილობრივ 7 ადმინისტრაციულ ერთეულს.
„ჩვენთვის მნიშვნელოვანია, რომ მოსახლეობა ახალ წელს, დიდთოვლობისგან შექმნილი პრობლემების გარეშე შეხვდეს. ყველაფერს ვაკეთებთ, რომ ელექტრომომარაგება სრულად აღდგეს და არცერთი ოჯახი არ დარჩეს ელექტროენერგიის გარეშე. პრობლემა უახლოეს 24 საათში უნდა მოგვარდეს,“ — განაცხადა დავით კოდუამ.
„ენერგო-პრო ჯორჯიას“ წარმომადგენლის, ირაკლი გოგინავას ინფორმაციით, სოფლებში ამ ეტაპზე 19 ჯგუფი 24-საათიან რეჟიმში მუშაობს და ხვალ, დღის ბოლომდე, ელექტრომომარაგება სრულად აღდგება.
ზუგდიდის მერიის შესაბამისი სამსახურები 24-საათიან რეჟიმში მუშაობენ.
შექმნილია ცხელი ხაზი: 591 17 17 99 | 577 190 436
